ഐ.എഫ്.എഫ്.കെ കൊച്ചിയിലെ ഉദ്ഘാടനവുമായി ബന്ധപ്പെട്ട വിവാദം വേണ്ടിയിരുന്നില്ലെന്ന് സലിം കുമാറിന് ഇപ്പോൾ തോന്നുന്നുണ്ടാകുമെന്ന് സംവിധായകനും ചലച്ചിത്ര അക്കാദമി ചെയർമാനുമായ കമൽ. സംവിധായകൻ ടി ദീപേഷ് ഉന്നയിച്ച ആരോപണങ്ങൾ മറുപടി അർഹിക്കുന്നില്ല. സ്വന്തം സിനിമകൾ ഫെസ്റ്റിവലിലേക്ക് തിരഞ്ഞെടുക്കപ്പെടാത്തവരാണ് ആരോപണങ്ങൾ ഉന്നയിക്കുന്നതെന്നും കമൽ കണ്ണൂരിൽ പറഞ്ഞു.
ചലച്ചിത്രമേളയിലേക്ക് സലീമിനെ ക്ഷണിച്ചിരുന്നതാണ്. എന്നാൽ അദ്ദേഹത്തിന് എന്തുകൊണ്ടാണ് മനസിലാകാതെ പോയതെന്ന് അറിയില്ല. വ്യക്തികൾക്ക് രാഷ്ട്രീയമുണ്ടാകാം. എന്നാൽ സിനിമയിൽ രാഷ്ട്രീയം കലർത്തുന്നത് ശരിയല്ല. ഇക്കാര്യം അദ്ദേഹത്തിന് ബോധ്യപ്പെട്ടിട്ടുണ്ടാകാമെന്നും കമൽ പറഞ്ഞു.
