കൊടകര കുഴൽപ്പണ കേസ്: ഹർജി ഇന്ന് ഹൈക്കോടതിയിൽ; ആർ.എസ്.എസ് പ്രവർത്തകൻ ധർമരാജിന്റെ സഹോദരനെ ഇന്ന് ചോദ്യം ചെയ്യും

21

കൊടകര കുഴൽപ്പണകേസിൽ എൻഫോഴ്‌സ്‌മെന്റ് ഡയറക്ടറേറ്റ് അന്വേഷണം ആവശ്യപ്പെട്ടുള്ള ഹർജി ഇന്ന് ഹൈക്കോടതി പരിഗണിക്കും. ലോക് താന്ത്രിക് യുവ ജനതാദൾ നേതാവ് സലിം മടവൂർ നൽകിയ ഹർജിയിൽ കള്ളപ്പണത്തിന്റെ സ്രോതസ് കണ്ടെത്താൻ കേന്ദ്ര ഏജൻസിയുടെ അന്വേഷണം വേണമെന്നാണ് ആവശ്യം.

കേസ് പരിഗണിക്കുമ്പോൾ ഇഡി തങ്ങളുടെ നിലപാട് ഇന്ന് വ്യക്തമാക്കും. ഇഡി അന്വേഷണം നടത്തേണ്ടതില്ലെന്നും പൊലീസ് അന്വേഷണം ശരിയായി നടക്കുന്നുണ്ടെന്നുമാണ് ഇഡി ആദ്യഘട്ടത്തിൽ പറഞ്ഞിരുന്നത്. കൂടുതൽ വ്യക്തമായ തെളിവുകൾ ലഭിച്ചാൽ അന്വേഷിക്കാം എന്നുമായിരുന്നു ഇഡിയുടെ നിലപാട്. കള്ളപ്പണം വെളുപ്പിക്കൽ നിയമപ്രകാരം അന്വേഷണം ആവശ്യപ്പെട്ട് അന്വേഷണ ഏജൻസിക്ക് പരാതി നൽകി ഒരു മാസം കഴിഞ്ഞിട്ടും നടപടിയുണ്ടാകാത്ത സാഹചര്യത്തിലാണ് കോടതിയെ സമീപിച്ചതെന്ന് ഹർജിക്കാരൻ പറഞ്ഞു. അതേ സമയം പണം നഷ്ടപ്പെട്ട ആർ.എസ്.എസ് പ്രവർത്തകൻ ധർമരാജിന്റെ സഹോദരൻ ധനരാജിനെ ചോദ്യം ചെയ്യും. കുഴൽപ്പണ ഇടപാടിൽ ഇരുവർക്കും ബന്ധമുണ്ടെന്ന കണ്ടെത്തലിനെ തുടർന്നാണ് നടപടി.