പാലപ്പിള്ളി പിള്ളത്തോടിന് സമീപം വീണ്ടും കാട്ടാനക്കൂട്ടം ഇറങ്ങി

ആമ്പല്ലൂർ പാലപ്പിള്ളി പിള്ളത്തോടിന് സമീപം കാട്ടാനക്കൂട്ടം ഇറങ്ങി. തിങ്കളാഴ്ച രാവിലെ രണ്ട് കൂട്ടങ്ങളിലായി 30 ഓളം ആനകളാണ് പ്രദേശത്ത് ഇറങ്ങിയത്. പിള്ളത്തോടിന് സമീപത്തുള്ള റബ്ബർ തോട്ടത്തിലെത്തിയ ആനകൾ റോഡിൽ നിലയുറപ്പിച്ചതോടെ ഏറെ നേരം പാലപ്പിള്ളി റോഡിൽ വാഹന ഗതാഗതം തടസപ്പെട്ടു. ആനകളുടെ ആക്രമണം ഭയന്ന് വാഹനങ്ങൾ യാത്രക്കാർ മാറ്റിയിടുകയായിരുന്നു. റോഡ് മുറിച്ചുകടന്ന ആനകൾ വീണ്ടും റബ്ബർ തോട്ടത്തിൽ തമ്പടിക്കുകയായിരുന്നു. പിന്നീട് വനപാലകരും തോട്ടം തൊഴിലാളികളും ചേർന്ന് ആനക്കൂട്ടത്തെ കാട്ടിലേക്ക് തുരത്തി.