കൊടുങ്ങല്ലൂർ ശ്രീകുരുംബ ഭഗവതി ക്ഷേത്രത്തിൽ ഭരണി മഹോത്സവത്തിന്റെ ആരവങ്ങളുമായി ശനിയാഴ്ച കോഴിക്കല്ല് മൂടും. ഇനി കൊടുങ്ങല്ലൂർ കാവിൽ അശ്വതി കാവുതീണ്ടൽ വരെ ഇനി പതിനായിരങ്ങളുടെ പ്രവാഹമായിരിക്കും. ഉച്ചപൂജയ്ക്ക് ശേഷം രാവിലെ 11നാണ് കോഴിക്കല്ല് മൂടൽ ചടങ്ങ് തുടങ്ങുക. ക്ഷേത്രത്തിന്റെ വടക്കേ നടയിലെ വലിയ ദീപസ്തംഭത്തിന് താഴെ ഭഗവതി വീട്ടുകാര്‍ വലിയ കല്ലുകൾ കുഴികുത്തിമൂടി മേലെ ചെമ്പട്ട് വിരിക്കും. തച്ചോളി വീട്ടിലെ കോഴികൾ ഹാജരുണ്ടോയെന്ന് മൂന്ന് വട്ടം വിളിച്ച് ചോദിക്കും. തച്ചോളി തറവാട്ടുകാർ ചെമ്പട്ടിൽ കോഴികളെ സമർപ്പിക്കും. ഭരണി പാട്ടിന്റെ താളം മുറുകി കാവാകെ പടരുന്നതോടെ കോഴിക്കല്ല് മൂടൽ ചടങ്ങ് അവസാനിക്കും. പിന്നീട് കോമരങ്ങളുടെ വരവ് തുടങ്ങും. 24 നാണ് ഭരണി മഹോൽസവത്തിന്റെ പ്രധാന ചടങ്ങായ അശ്വതി കാവുതീണ്ടൽ. കോഴിക്കല്ല് മൂടൽ ചടങ്ങിന്റെ ഭാഗമായി ദേവസ്വം അധികാരികൾ കൊടുങ്ങല്ലൂർ വലിയ തമ്പുരാന് വെള്ളിയാഴ്ച കാഴ്ചക്കുല സമർപ്പിച്ചു. ദേവസ്വം അസി. കമീഷണർ സുനിൽ കർത്ത, മാനേജർ കെ വിനോദ് എന്നിവരാണ് വലിയ തമ്പുരാൻ കുഞ്ഞുണ്ണിരാജയ്ക്ക് കാഴ്ചക്കുല സമർപ്പിച്ചത്.
