തൃശൂർ നഗരത്തിൽ കറങ്ങി നടന്ന് സ്ത്രീകളുടെ മാലപൊട്ടിക്കുന്ന സംഘത്തിലെ രണ്ട് പേർ പിടിയിൽ

1910

തൃശൂർ നഗരത്തിലും പരിസരത്തുമായി സ്ത്രീകളുടെ മാല മോട്ടോർ സൈക്കിളിൽ വന്ന് പൊട്ടിച്ച സംഭവങ്ങളുമായി ബന്ധപ്പെട്ട് രണ്ടു പേരെ നെടുപുഴ പോലീസ് അറസ്റ്റ് ചെയ്തു. ഒല്ലൂർ സ്റ്റേഷൻ പരിധിയിലെ വെട്ടുകാട് പുളിഞ്ചോട്ടിലുള്ള ചിറയത്ത് ജിബിൻ (34), ആശാരിക്കാട് വാഴപ്ലാക്കൽ റിജോ സിറിയക് (26) എന്നിവരെയാണ് പോലീസ് അറസ്റ്റ് ചെയ്തത്. അടുത്ത ദിവസങ്ങളിലായി നെടുപുഴ പോലീസ് സ്റ്റേഷൻ പരിധിയിലെ ചിയ്യാരം, മണ്ണുത്തി സ്റ്റേഷൻ പരിധിയിലെ മുല്ലക്കര, പീച്ചി സ്റ്റേഷൻ പരിധിയിലെ പട്ടിക്കാട് എന്നിവിടങ്ങളിൽ വച്ച് സ്ത്രീകളുടെ സ്വർണമാല മോട്ടോർ സൈക്കിളിൽ വന്ന് പൊട്ടിച്ച സംഭവങ്ങളിലാണ് നെടുപുഴ പോലീസ് ഇരുവരെയും പിടി കൂടിയത്. ഇക്കഴിഞ്ഞ വിഷുവിന്റെ തലേന്ന് പെസഹ ദിനത്തിൽ ആണ് അടുത്തുള്ള ബേക്കറി- കൂൾഡ്രിംഗ്സ് കടയിൽനിന്നും സോഡ വാങ്ങിക്കുടിച്ച ശേഷം മോട്ടോർ സൈക്കിളിൽ വന്ന രണ്ടു പേർ കടക്കാരിയായ 63കാരിയുടെ മൂന്നര പവന്റെ സ്വർണ്ണമാല വലിച്ചു പൊട്ടിച്ചു കടന്നു കളഞ്ഞത്. തുടർന്ന് മണ്ണുത്തി, പീച്ചി പോലീസ് സ്റ്റേഷൻ പരിധിയിലും സമാന സംഭവങ്ങൾ ഉണ്ടായതോടെ തൃശൂർ സിറ്റി പോലീസ് കമ്മീഷണർ ആദിത്യയുടെയും എ.സി.പി. വി.കെ.രാജുവിന്റേയും നിർദ്ദേശാനുസരണം പ്രത്യേക ടീം രൂപീകരിച്ച് നടത്തിയ അന്വേഷണത്തിലാണ് പ്രതികളെ പിടികൂടിയത്. നെടുപുഴ പോലീസ് സ്റ്റേഷൻ ഇൻസ്പെക്ടർ ടി.ജി. ദിലീപ്, സബ് ഇൻസ്പെക്ടർ അനിൽ, ഷാഡോ പോലീസ് അംഗങ്ങളായ പ്രദീപ്, സുനീബ്, നെടുപുഴ സ്റേഷനിലെ രതീഷ് മാരാത്ത്, ശ്രീജിത്ത്, പ്രശാന്ത് എന്നിവരായിരുന്നു പ്രധാന ടീമംഗങ്ങൾ. തുടർന്ന് നഗരത്തിലും പരിസരത്തും മണ്ണുത്തി, പുതുക്കാട് ,പീച്ചി ദേശീയപാതയിലെ അടക്കം നൂറ്റി അമ്പതിലധികം ക്യാമറകളിലെ ദൃശ്യങ്ങൾ പരിശോധിച്ചാണ് സംശയിക്കുന്ന പ്രതികളിലേക്ക് എത്തിച്ചേർന്നത്. പിന്തുടർന്നു വരുന്ന പോലീസിൽ നിന്നും രക്ഷപ്പെടാനും പിടിക്കപ്പെടാതിരിക്കാനും പ്രതികൾ അവർ ഉപയോഗിച്ചിരുന്ന മോട്ടർസൈക്കിളിന്റ നമ്പർ പ്ലേറ്റ് ഉള്ളിലേക്ക് വളച്ചു വെച്ചും അവർ ധരിച്ചിരുന്ന വസ്ത്രങ്ങൾ പോകുന്ന വഴിക്ക് ഊരി റോഡരികിൽ ഉപേക്ഷിക്കുകയുമാണ് ചെയ്തിരുന്നത്. പ്രതികൾ ഇടയ്ക്കുവച്ച് മോട്ടോർ സൈക്കിളിൽ നിന്നും ഇറങ്ങി കുറേദൂരം ഓട്ടോറിക്ഷയിൽ സഞ്ചരിച്ചുമാണ് ഇതുവരെ പോലീസിനെ വെട്ടിച്ചുകടന്നിരുന്നത്. കുറ്റകൃത്യം ഉണ്ടായ ഉടൻ തന്നെ പോലീസ് നഗരം അടച്ച് വാഹന പരിശോധന നടത്തിയിട്ടും പ്രതികളെ കിട്ടാതിരുന്നത് ഇക്കാരണങ്ങൾകൊണ്ടാണ്. പ്രതികൾ സംഭവത്തിന് മുമ്പും പിന്നീടും ആയി സഞ്ചരിക്കാൻ സാധ്യതയുള്ള മുഴുവൻ റോഡുകളിലേയും ക്യാമറ ദൃശ്യങ്ങൾ ശേഖരിച്ചും പകൽ മുഴുവനും ആയുള്ള ദൃശ്യങ്ങൾ പരിശോധിച്ചുമാണ് സംശയിക്കുന്ന ആളുകളിലേക്ക് എത്തിച്ചേർന്നത്. പീച്ചി ഡാം റോഡിൽ വച്ച് ഉണ്ടായ സംഭവത്തിൽ ഒരു ജില്ലാ ജഡ്ജിയുടെ അമ്മയാണ് പ്രതികളുടെ ആക്രമണത്തിനിരയായത്. മാല പൊട്ടിക്കാനുള്ള ശ്രമത്തെ ശക്തമായി എതിർത്ത അവരിൽനിന്നും പ്രതികൾക്ക് മാല കിട്ടിയില്ല. അതോടെ പ്രതികൾ ശ്രമം ഉപേക്ഷിച്ച് കടന്നുകളയുകയായിരുന്നു. മണ്ണുത്തി മുളയം റോഡിൽ പള്ളിയിലേക്കുള്ള കുരിശിന്റെ വഴി പ്രദർശനം കാണാൻ നിന്നിരുന്ന നഴ്സിന്റെ മൂന്നു പവനുള്ള മാലയാണ് പ്രതികൾ പൊട്ടിച്ചു കടന്നു കളഞ്ഞത്. സംഭവത്തിനു ശേഷം ഷോക്കിൽ സ്തബ്ധയായി നിന്ന അവർക്ക് പ്രതികരിക്കാൻ കഴിഞ്ഞില്ല. കവർച്ചചെയ്ത സ്വർണ്ണമാലകൾ പ്രതികൾ ഒല്ലൂരിലുള്ള ആഭരണ നിർമ്മാണശാലയിലാണ് വിൽപ്പന നടത്തിയത്. കവർച്ചക്കിടെ പൊട്ടിയ മാല വെട്ടുകാടുള്ള സ്വർണപ്പണിക്കാരന്റെ കയ്യിൽ ഭാര്യയുടെ ആഭരണം എന്ന് പറഞ്ഞു വിളക്കിയ ശേഷം ആണ് ഒല്ലൂർ മരത്താക്കരയിലുള്ള കടയിൽ വിൽപ്പന നടത്തിയത്. കേസ് അന്വേഷണ സംഘത്തിൽ ടീമംഗങ്ങളെ കൂടാതെ നെടുപുഴ പോലീസ് സ്റ്റേഷനിലെ സബ് ഇൻസ്പെക്ടർ പൗലോസ്.എ. എസ്.ഐ. ബാലസുബ്രഹ്മണ്യൻ, സിവിൽ പോലീസ് ഓഫീസർമാരായ ശ്രീനാഥ്, റിൻസൺ, നവീൻ, സൈബർ സെല്ലിലെ പോലീസ് ഉദ്യോഗസ്ഥർ എന്നിവരും ഉണ്ടായിരുന്നു.

Advertisement
Advertisement